ايكوسودان نت التنمية مستقبلنا
مقالات مشابهة
حصلت لي القصه دي في بداية الثمانينات من القرن الماضي وطبعا ما كانت في وسائل اتصالات زي حسي . بعد ما اتخرجت من الجامعه بحثت عن وظيفه هنا في السودان نهائي ما اتوفقت وفي من الأيام لقيت لي إعلان في جريده انه في معاينات في فندق الهلتون لانتداب محاسبين للعمل في دولة الإمارات العربية ومن دربي داك جريت على الفندق كان آخر يوم سبحان الله طوالي قدمت أوراقي وعملو لي المعاينة بعد اسبوع ظهرت النتيجه قبول مشيت عملت إجراءات السفر وما طولت سافرت طوالي. بعد وصلت هناك تاني يوم مشيت الشركه واستلمت شغلي وكان ممتع جدا والمرتب كان كتيير ومبروك وانا ما مصدق والله العظيم وكنت فرحان فرح شديد والله ومن اول وهله رسلت لي أهلي قلت ليهم صلحو البيت واشتروا عفش جديد وريحت اهلي آخر راحه وطوالي فكرت اشتري لي قطعة أرض وابتديت ابني فيها وأموري مشت آخر حلاوه ففكرت اجي البلد اجازه لأول مرة بعد اربعه سنوات لما جيت قالو لي إلا تعرس قلت ليهم خلاص بفتش لي عروس لما اجي ألمره الجايه بإذن الله. بعد الاجازه انتهت ورجعت. ووصلت كانت معنوياتي مرتفعه ومبسوط شديد من انجازاتي في الفتره دي . اها بعد كم شهر من رجوعي عندنا واحد من أهلنا مقيم معانا في الإمارات جاء البلد عرس لما رجع جاب معاهو شريط الفيديو حق العرس اها انا مشيت باركت ليهو واتفرجنا في الشريط والله عرسه كان لذيذ جدا والبنات آخر حلاوه في واحده كانت ظاهره من دون البنات سألته منها قال لي من أهلنا وهم اخوات اتنين واحده منال واحده نوال انا مسكت في منال على أساس أنها ياها الأنا عاوزها طوالي من دربي داك رسلت لي أهلي قلت ليهم امشو اخطبو لي فلانه منال بت حاج احمد والله اهلي فرحو فرح شديد طبعا عرفوها طوالي مشو اتكلمو وادونا ليها قلت ليهم خلاص ما تعملو اي حاجه لحدي ما اقول ليكم . طوالي مرقت من بيت العزابه ومشيت أجرت لي شقه وفرشتها وبقيت جاهز طوالي رسلت لي الشيله والمال وقلت ليهم امشو كملو العرس ورسلو لي القسيمه عشان اجهز ليها الأوراق وتجي بعد ما كل شي تم وحددنا يوم للجيه وحجزت ليها عاد اليوم داك انا فرحان فرح شديد وقربت اطير من الفرح مشينا المطار ومعاي اصحابي لما وصلت ودخلت الصاله عشان امرقها قربت اغمر في الصاله لقيتها ما ياها زولتي المنتظرها طبعا البسويهو غلبني سلمت عليها سلام بارد ومرقتها وجينا الشقه ومعاي اصحابي ، اصحابي ما قعدو كتير رجعو طوالي هي لما شافتني كده قالت في شنو مالك قلت ليها انتي ما ياها الأنا عاوزها ومن بكره الطياره إلجابتك ترجعك والله بدون مبالغه أصلها ما ناقشتني كتير قالت لي اسمع ما شينه في حقي اجي وارجع تاني يوم ؟ ما ممكن تصبر على شهر وترجعني انا والله ما ح ازعجك الناس تقول فيني شنو ؟ وانا كنت محبط لآخر درجه فكرت وقدرت قلت ليها خلاص بعد شهر بالضبط من الليله انتي ح ترجعي وانا برضو ما ح ازعجك قالت لي خلاص فتحت ليها الاوضه التانيه ووالله شالت شنطتها براها دخلتها . وبعدين قلت ليها اسمعي يكون في علمك لو جو ضيوف انتي ح تطلعي تستقبليهم وترجعي تاني قالت لي خلاص وجيت ما نمت من المغسه المسكتني بعد ما ادوني اجازه مشيت الصباح رجعت شغلي عادي وما اتكلمت مع أي زول في حاجه الجماعه سألوني قلت ما عندي شي ولما مرقت الصباح مشيت جبت ليها اكل ودقيت ليها الباب قلت ليها لو عاوزه تاكلي الأكل في المطبخ وهي سبحان الله تمشي تعمل الأكل تجهزو وتختو لي وتدخل الاوضه انا لما اجي راجع ألقى الأكل جاهز اكل واخلي العده ولما يجو الضيوف تمرق تعمل واجب الضيافة وتدخل تاني والله ما حسستني انها متضايقه بعد مرات افتح الاوضه اقول اشوفها بتعمل في شنو ألقاها يا بتصلي يا نايمه يا بتقرا في المصحف الشريف وسبحان الله ما حصل في يوم من الأيام حاولت تغريني ولا بأي نوع من الإغراءات وانا أصله ما ميلت عليها ولا حاولت أقرب منها . قبل الشهر ما يتم بي يومين انا بعد ما مرقت الشغل جابت الجواز ختتو في التربيزه وكتبت لي جمبو ورقه صغيره لي حسي محتفظ بيها كتبت لي فيها خلاص الشهر تم وانا جاهزه وده الجواز . انا بعد اكلت شلت الجواز وجاي مارق اركب العربيه عشان امشي ااشر ليها لاقاني واحد صاحبي اسمه حسن شاف الجواز في جيبي قال لي ماشي وين بي جوازك قلت ليهو ماشي أسفر المدام قال لي وهي المدام متين جات عشان تسفرها قمت حكيت ليهو الحكايه وده اول زول احكي ليهو بعدين استغرب جدا قال لي اسمع هي مالها انت شفت منها حاجه بطاله قلت ليهو ابدا والله قال ولا جاتك قريب قلت ليهو لا والله قال أصلها ما اتكلمت معاك قلت ليهو لا والله قال لي لما انت تمرق هي بتسوي شنو قلت ليهو متى ما افتح الباب ألقاها بتصلي أو نايمه أو بتقرا في المصحف ولا بتسالني من حاجه قال والله انت عوير هي شينه قلت ليهو ما شينه والله لكن أختها الأنا كنت عاوزها سمحه شديد قال لي والله العظيم انت بتبالغ في واحده بالمواصفات دي بفرطو فيها سماحة شنو الانت بتتكلم عنها دي يا زول انت جنيت ولا شنو امشي يا زول ادخل على مرتك وعيش حياتك وما ح تندم بعد داك حسن صاحبي مشي وانا قعدت في عتبة البيت بره وفكرت لقيت كلام حسن صحي اها جيت راجع دخلت اوضتي وناديتها يا منال تعالى طبعا لأول مره اناديها من ما جات ، قالت لي اها السفر متين ، قلت ليها مافي سفر قالت لي ليه مافي حجز وطبعا كانت هادئه في كلامها معاي ما ممكن تتخيلوها قلت انا ما مشيت قال لي في شنو؟ قلت ليها لاني عايزك معاي هنا طوالي انفجرت بالبكاء بكت بكا شديد انا طوالي ضميتها على وانا زاتي بكيت من عوراتي السويتها ومن اللحظه ديك وهي زوجتي والله انا اسعد زوج في الدنيا وأنجبت منها بنين وبنات وأحسنت تربيتهم والله الحمد لله على كل حال كنت عاوز اضيع سعادتي بي يدي . أما زولتي الكنت عاوزها اتزوجت وأطلقت مرتين سبحان الله وكل حاجه قسمه ونصيب .
