ايكوسودان نت التنمية مستقبلنا
مقالات مشابهة
بقلم وداد حجازي
كنت بحب لي بت حب شديد خلاص وبريدها من جوه قلبي وكنت بتمني لمتين اعرسها وعلي حسب ظروفي ما كان في طريقه للعرس نهائي فقررت اني اسافر واغترب عشان الملم لي قروش واجي اعرس كلمتها بي قراري ده فرحت فرح شديد خلاص قالت لي خلاص سافر ربنا يسهل ليك قلت ليها اسمعي يابت الناس انا مسافر عشانك بتصبري معاي ولا ما تصبري? قالت لي بصبر . طوالي مشيت خطبتها بصفه رسميه من اهلها.
اراد الله عندي ولد عمي اكبر مني مقيم في الامارات كلمتو قال لي يازول مافي مشكله نسعي وان شاء الله نلقي ليك طريقه وفعلا المده ما طولت لقو لي طريقه وسافرت وطوالي اشتغلت في مجالي شغل سمح شديد ومن اول شهر ابتديت ارسل لي اهلي عشان يصلحو حالهم وانا بي جاي القط واخت للعرس لما تميت سنتين خلاص فاض بي قلت بعد كده ارجع عشان اعرس قلت ليها خلاص وريني مواصفات الشيله عشان اجيبها معاي من هنا وح اجيبها سته سته قالت لي لا تمنيه عشان ابقي زي اخواتي قلت ليها خير وبركة اصلا مافي مشكله فعلا كل مره ترسل اشكال وانا اشتري حاجات كلها غاليه وبالشي الفلاني ولكن ما استخسرت فيها حاجه لاني بحبها شديد واشتريت الدهب والشبكة بعد ما انتهيت واشتريت اي شي حددت يوم الرجعه وكلمتها وصلت المطار زي الساعه تلاته الضهر علي بال ما سلمت علي اهلي واتغدينا واستحميت وغيرت هدومي المغرب مشيت ليهم كنت مشتاق ليها شديد ولمتين اصل واشوفها سلمت علي سلام بارد صدمتني بالمقابله البايخة سالتها قلت ليها مالك قالت لي مافي حاجه اخدت قعدتي معاهم ووريتهم انو اهلي بيجو يحددو معاكم اليوم ويسدو المال ويقعدو معاكم ننسق البرنامج قالت لي كويس مشيت علي كده ومخي يودي يجيب ياربي مالها? والحصل شنو وراي? مع انها كانت متواصله معاي كويس جدا واصلا ما مر يوم غير ما نتونس ونتكلم.
تاني يوم من جيتي من الصباح اتصلت علي تلفون قالت لي ما تجيبو الشيله الا بعد انا اجي اشوفها قلت ليها الشيله جبتها ليك حسب طلباتك واهلي لحدي الان ما شافوها قالت لي لا لازم اجي اشوفها قلت ليها كويس ما مشكله تعالي شوفيها بس بعد المغرب في نفس اليوم جو هي ومعاها صاحبتها بعد ما شافو الشيله في حاجات قالت لي في حاجات لازم تتغير فعلا تاني يوم مشينا غيرناها في السكة ونحن جايين سالتني سؤال غريب قالت لي اسمع انت جايب معاك قروش كتيره? قلت ليه السؤال ده? قالت لي لانو لسه حاجاتي كتيره قلت ليها ما مشكله وصلتها بيتهم وانا جيت بيتنا والحاجات الجبناها من السوق قالت دخلها في الشنطه ومافي زول يشوف حاجه قلت ليها خير .
تاني يوم قاعدين انا واهلي بنتناقش في برنامج العزومة وسد المال والحاجات دي امي واختي قالو نمشي نحدد معاهم قلت ليهم كويس لحدي ما اتصل عليهم واوريهم انكم جايين في قعدتنا دي جات صاحبتها قالت لي والله في جلسات بتاعت فيشل لازم تتعمل قبل العرس الجلسه بي 500 جنيه وهم عشره جلسات وكمان حجزنا عند الكوافير الفستان والحنه وتجهيز العروس بي 20 الف وهاك ده رقم المره ست الكوافير عشان تاكد علي الحجز شلت الرقم وسكت متحير طبعا ولسه اهلي ما حددو حاجه جاتني صاحبتها تاني يوم قالت لي اسمع نحن حجزنا الصاله والتصوير اوت دور وإن دور
وهاك دي ارقام التلفونات عشان تاكد علي الحجز تلفون الصاله وتلفون المصوراتي والاوت دور في برج الفاتح وده براهو بي 15 الف وكمان في اوفر تايم للجيرتق ده طبعا حسابو براهو وفي عربيه فاخره حتسوقكم من الكوافير للصاله بي اربعه الف والجيرتق حجزنا ليهو فنانه قالت الا 8 الف هاك ده رقمها عشان تاكد عليها وشايله ليها كشف طويل وعريض لحاجات الجيرتق ده حسابو براهو. بعد صاحبتها مشت راسي ضرب قلت معناها انا ما بقدر اكفي ده كلو طوالي قلت لي اهلي ما تمشو لحدي ما اقابل الزوله دي واحدد معاها لانو حسيت انو كلامها فيهو تعجيز. اتصلت عليها قلت ليها يازوله ده كلام شنو القالتو لي صاحبتك ده? قالت لي صاحبتي رسلتها ليك انا وانت لازم تنفذ لي طلباتي دي قلت ليها كويس لحدي ما اضرب حساباتي قالت لي كويس وانا لسه بضرب في الحسابات اتصلت علي المسا قالت لي اسمع الحفله لازم تكون بحسين الصادق لانو اخواتي واحده بي طه سليمان وواحده بي عاصم البنا برسل ليك رقم التلفون بتاع مدير اعمالو وكمان شهر العسل عاوزاهو في ماليزيا لانو اخواتي واحده مشت المالديف وواحده مشت تركيا انا هنا خلاص قفلتها معاي للزراره الاخيره تاني يوم الصباح اتصلت عليها قلت ليها اسمعي يا بت الناس انا زاتي عندي عزومة بعملها وبنادي اهلي دي مش برضو بتكلف? وبعدين تعالي الحاجات الانتي عاملاها دي لمنو? انتي عاوزه عرس ولا هي فشخره في الفاضي انا ما باجر صاله بنجيب صيوان قدام البيت وسفر ما بسافر باجر لي شقه مفروشه اقضي فيها شهر العسل وكمان اوت دور وان دور ده شنو نمشي نتصور في الاستديو عادي وخلاص وعربيه ناجرها ليه اصحابي بسوقونا وكمان ليه اوفر تايم نجرتق في بيتكم ولا بيتنا عادي وكان علي الحفله اصحابي جيبو لي فنان يغني للصباح الجيرتق ما عندي مانع حسب العوايد بنعملو وبجيب حاجاتو قالت لي اسمع الفرحة واحده قدر ما حنستها قالت لي ابدا بس ده كلامي وابت تتنازل قلت ليها كويس بنجيكم انا واهلي ونشوف وده كلو كلامها هي وصاحبتها يشرطن ويخيتن براهن لا اهلي مشو ولا اتفقو المهم بالليل مشينا انا وامي واختي لقينا ابوها قاعد يجبد ليهو في شيشه بعد ما ضيفونا فتحنا الموضوع قلت ليهم يا جماعه الزوله دي مطالباني بي حاجات انا ما بقدر عليها فدحين حاولو اختصرو امها فتحت خشمها قالت لي لما ما عندك قدره متشبك في العرس مالك اجلو لحدي ما تقدر وهي مش اقل من اخواتها الام اتصدرت للكلام والابو خشمو ما فتحو المهم اتناقشنا كتير وما طلعنا منهم بي حاجه قلت ليهم خلاص انسو الفكره و مرقت قرفان وزهجان وكرهت اليوم اللماني فيها وخلاص قلت ما داير عرس زاتو وقررت ارجع الامارات واقطع الاجازه ولاحظو اني اسبوع ما تميتو تاني يوم اتصلت علي صاحبتها قالت لي مما انتو مشيتو هي بتبكي قلت ليها خليها تنشق وانا زاتي العرس خليتو وقولي ليها انسي انك عرفتيني اتاري الكلام كلو من امها ونهيت علاقتي معاها بس اهلي قالو لي ما ممكن لازم تعرس وامي قالت لي ما عافيه ليك عرس طوالي ومشت اتكلمت لي في بت خالتي وطوالي ادوني ليها بعد اسبوع سدينا المال وودينا الشيله والحاجات وبعد عشره يوم سوينا العرس اجرنا صيوان قدام بيتنا وعملنا عزومة واحده ولمينا الحبايب كلهم ومشينا الاستديو اتصورنا عادي واجرت لي شقه قعدت فيها تلاته اسابيع قضيت اجمل ايامي فيها وبعد مرقنا من الشقه كل يوم معزومين في محل حقيقي كنت سعيد جدا وفرحان فرح شديد وتميت اجازتي ورجعت وديك لما عرفتني داير اعرس بت خالتي ندمت ندامة شديده وبقت ترسل لي تعال بالعندك اي حاجه راضيه بيها قلت ليها ما طايق اشوف وشك وبعد تلاته شهور مرتي جات لاحقاني والحين انا عايش اجمل عيشه.
وحكينا القصه دي ليه عشان البنات ما يتمسكو في الحاجات الفارغه والقادر يسوي يمشو حالهم ومافي داعي للفشخره والبوبار والواحد بعد ينتهي من العرس يلقي نفسو مديون ليه بس ده كلو? ولا باقي ليكم شنو يا جماعه.
