ايكوسودان نت التنمية مستقبلنا
مقالات مشابهة
ضِفاف يراع :
بُح صوتنا ونحن بننادي بي تقليم الأشجار (proning) بمدينتي الدمازين والروصيرص خاصة أشجار النيم والمهوقني العملاقة وعددنا الكثير من الفوائد لهذا التقليم من ضمنها المحافظة علي أرواح وممتلكات الناس والمحافظة أيضاً علي الأشجار من السقوط وتجديد شبابها والإستفادة من الإنتاج الخشبي سواء كان حطب حريق أو كتل منشورة ولكن لا حياة لمن تنادي من قبل الغابات أو المحلية أو المواطن .
معروف إنو في حاجة إسمها الإدارة الفنية للأشجار للإستفادة منها والمحافظة عليها وبي واسطة التقليم دا ممكن تتحكم في الشجرة سواء إرتفاع أو عرض للمجموع الخضري فغير منطقي إنك تزرع شجرة وتخليها لمن تكبر وتقع تكسر البيوت وتقطع أسلاك الكهرباء دا إذا ما كتلت زول .
إدارة الغابات هي المسئول الأول من الأشجار مع المحلية خاصة أشجار الطرق وفي أشجار إنزرعت من زمن الإنجليز ومن المفترض تُفرَع ويستفاد من إنتاجها لإستزراع باقي المساحات علي الطرقات وياحبذا لو كانت أشجار مثمرة زي المانجو .
أشجار النيم والمهوقني من الأشجار سريعة النمو ويجب إنو يتم تفريعها كل سنتين تلاتة عشان ما يكبر المجموع الخضري ويشكل ضغط علي المجموع الجذري وتكون الشجرة آيلة للسقوط بواسطة الرياح .
للآسف الشديد إدارة الغابات غير مهتمة بالجانب الفني بقدر ما إنو مهتمه بالجانب الإيرادي فقط ومفروض برنامج التقليم دا يكون إتنفذ بالطرقات قبل فصل الخريف بالتنسيق مع المحليات وإدارة الكهرباء ومعاهو إرشاد للمواطن عشان يفرع أشجار المنازل كبيرة الحجم .
المطرة والرياح الجات أمس دي خلفت خسائر كبيرة في الأشجار كبيرة العمر علي مستوي الشوارع والبيوت وفي الممتلكات وقطعت كمية من أسلاك الكهرباء خلت أحياء دون كهرباء لي أكثر من يوم .
رياح لي مدة ساعة كشفت غشاوة إدارة الغابات والمحلية والمواطن وخلت البلد كلها تكورك والحمدلله مافي فقد في الأرواح وكنا قاب قوسين أو أدني من ذلك .
علي إدارة الغابات والمحليات وضع برنامج تقليمي عاجل للأشجار دي عشان الناس تحافظ علي الأشجار وأرواح وممتلكات المواطنين وعلي كل المواطنين في مدينتي الدمازين والروصيرص تفريع الأشجار كبيرة الحجم وفق الأسس والضوابط الفنية المعروفة .
إدارة الكهرباء مسئولة مسئولية مباشرة عن الأسلاك المرمية في الأرض للأن لأنو سنوياً بتطلع ليها ميزانية صيانة خطوط قبل الخريف سأعود للموضوع دا لاحقاً إن شاء الله لكن إذا إستمر الإهمال بي نفس الطريقة الحالية دي من جميع الجهات ذات الصلة فالناس تتهيأ لي فقدان الأرواح والممتلكات خاصة نحن مقبلين علي فصل خريف هو الأعنف من حيث الرياح والأمطار حسب التوقعات فهل نعي الدرس من البداية ؟ والجواب بكفيك عنوانو ولا بنعمل حِميل .
تمرق من الكوليرا تحاصرك الكورونا تمرق من الكورونا يحظروك ويضيعك فرع بتاع شجرة في بيتك
اللهم بلغت فأشهد
إيهاب بابكر
6/6/2020م
