ايكوسودان نت التنمية مستقبلنا
مقالات مشابهة
**صفو النيه **
بقلم وداد حجازي
لبس احمد اجمل ما عنده من الملابس جلابيه بيضا مكويه وملفحة وطاقيه ومركوب من ابو خمسميه واتعطر باجمل العطور الباريسيه ومشي نفض العربيه وكان في اجمل حاله نفسيه.
ركب احمد ودور العربيه ورفع القزاز وبخ المعطر وشغل المسجل اولاد حاج الماحي بصوت خااااافت وماشي بمزاج عالي جدا في اثناء ما هو ماشي وقريب من الاستوب جاتو محادثه طوالي جنب العربيه وفتح التلفون عشان يرد علي المحادثة في اللحظة دي جات بت صغيره في عمر 12 او 13 سنه دقت ليهو القزاز دقه خفييييفه كده لما خلص من المكالمة نزل القزاز واتلفت عليها طوالي مدت يدها قالت ليهو لله قال ليها ربنا يدينا ويديك قالت ليهو يعني ما عندك قال ليها اي ما عندي بس طوالي وقبل ما يلحق يرفع القزاز جدعت ليهو مجموعة قروش وورقات من ابو عشرين في طرفو طبعا اندهش جدا قال ليها هوي اقيفي ده شنو? طبعا نهائي ما متخيل حاجه زي دي طوالي مشت ما وقفت هو لما شافها ماشه قفل العربيه ونزل منها وجري وراها هي لما شافتو جاري وراها قامت جاريه وهو خت جلابيتو في سنونو وجاري وراها ساكيها والناس الفي الشارع فاكرنها نشلتو قامو جارين معاهو والفي الشارع كلهم جارين والبت التقول غزاله نهائي مافي زول قدر يقبضها ولما دخلت في نص الحله اختفت وما زول عرفها دخلت بي ياتو شارع احمد وقف متحير ونفسو قايم والناس الكانو جارين معاهو وقفو واحد قال ليهو ياخي البت دي مجرمة شالت منك شنو? كل الناس فاكرين انها نشاله سبحان الله احمد قال ليهم ابدا البت ما شالت مني حاجه البت ادتني وانا عاوز ارجع ليها حقها اختفت البت عن الانظار ولحدي الان ما لاقيها سبحان الله
