ايكوسودان نت التنمية مستقبلنا
مقالات مشابهة
بقلم وداد حجازي
قبل كم يوم كان عندنا بكا في البلد والخبر جاني الضهر كده طوالي مشيت ناديت خالتي عشان تحرس لي اولادي وعدلت المحل وسافرت…. وصلت بيت البكا زي الساعه اربعه العصر بمجرد ما بكيت وسكت وجابو لي الغدا اولادي اتصلو علي قالو لي خالتك دي تعبانه شديد عندها قبضه شديده وتتلوي من الالم حاولي ما تبيتي تعالي قلت ليهم ما ببيت بجيكم طوالي فعلا ودعت الناس ومرقت في اللحظه دي اتصلت علي جارتي قلت ليها امشي اغلي ليها نعناع ولا حلبه اسعفيها من داب انا ما جيت… طبعا خلاص مافي طريقه ابيت ركبت لي ركشه ودتني الموقف لقيت البص خلاص مدور قطعت تذكرتي وقعدت في البدايه البص مشي كويس لما بقي في نص الدرب اتعطل ونزلونا منو والسواق والمساعد والركاب كلهم يحاولوا يصلحوا شغالين في البص غايتو بعد كم ساعه اتحرك وبقي ماشي بالراحه براحه لغاية ما وصلنا انا نزلت في الظلط طبعا الساعه زي 11 ونص والظلطـ بعيد جدا من بيتنا وما في اي مواصلات ولا ركشه ولا اي حاجه ترجعني وقفت مساااااافه وفي الاخر قلت امشي بي رجليني لانه مافي طريقه خلاص مسكت الدرب وماشه…. وما اكذب عليكم خايفه وقلبي ده مقطوع من الخوف واعصابي تلفانه وامشي واتلفت بعد قطعت مسافه كده عيني لعمود نور وتحته تلاته اولاد شماشه بشربو ليهم في سيجاره الله اعلم نوعها شنو والله لما شفتهم خلاص المعاي كملت تب فضلت مركزه معاهم قلت لو سالوني بناولهم شنطتي وما عندي ليهم حاجه شلت بطاقاتي دخلتهم في جيبي قلت كان ضاعو بتعبوني وخليت قريشاتي اصلهن ما كتار وتلفوني النوع الرخيص ده بشيلو في السفر وطبعا قاطع كهربا…. لما قربت علي محل الاولاد في كلب راقد يعميني ما شفتو طبعا مركزه مع الاولاد بس الكلب لما بقيت قصادو بس قام… قولت هو هو انا صرخت واندرشت وقعت علي وشي وخشمي اتملا تراب والله ما اشعر الا الاولاد التلاته واقفين قدامي واحد شال حجر نهر الكلب والاتنين الباقين قالو لي حاولي قومي يا خاله والله حسب اعصابي كانت بايظه غلبني اقيف نهائي بس التلاته مسكوني ووقفوني علي حيلي ومسكوني لغاية ما وصلوني حجر كبير كان في طرف الشارع قعدوني فيهو وواحد مشي جاب لي مويه من السبيل هاك يا خاله غسلي وشك واشربي وشنطتي طبعا طارت والله شالوها وجابوها في يدي قالو لي يا خاله مالك حايمه بالليل قلت ليهم يا اولادي جيت من سفر والبص اتعطل وما لقيت لي اي مواصلات قالو لي اقعدي حسي بتجي حاجه
الاولاد ديل شكلهم شماسة لكن وجوهم طيبة وتحس بأنهم ناس جار عليهم الزمن ومالقوا غير الشارع ملاذ اضافة لانو اعمارهم متوسطة ماكبار خالص وماصغار حوالي طمنطاشر سنة كده او ازيد حبه….
وقفوا معاي بعد شويه ظهرت ركشه من بعيد قالو لي لو اشرنا ليهو ما بقيف بقول نحن حراميه لكن بنعرف نوقفو يا خاله قلت ليهم كويس وانا ارجف زي القصبه من الخوف بتاع الركشه من بعيد اشرو ليهو ابي يقيف زي ما اتوقعوا بس التلاته اتماسكو وقفلو الشارع طوالي وقف ولما وقف عاوز يشاكلهم قال ليهم مالكم هو ما كان شايفني قالو ليهو توصل خالتنا دي قال ليهم خالتكم ماشه وين قالوا لي تركب توصف ليك محل ما ماشه قال لي اركبي بصراحه لما عاينت ليهو كده حسيت بيهو ما طبيعي وهم لما شافوني متردده طوالي ركبو معاي ختوني في النص واحد في يميني وواحد في شمالي والتالت ركب جمب السواق بقيت اوصف ليهم في الدرب لما وصلت قامو نزلو ومسكوني لما نزلت من الركشه فتحت مطبقتي دايره ادفع لسواق الركشه بس التلاته مسكو يدي قالو لي يا خاله نحن تلاته وانتي خالتنا تدفعي كيف يعني قلت ليهم طيب انزلو اتعشو والله اولادي قاعدين وخالتي قاعده قالو لي نحن اتعشينا قلت ليهم خلاص شاي سريع قالو ما بنشربو يا خاله قلت ليهم اهلكم وين انتو واحد فيهم شب قال لي يا خاله ارض الله واسعه وطوالي ركبو في الركشه الله اعلم مشو وين وانا دخلت. الحمد لله لقيت خالتي حالتها كويسه جيراني ما قصرو معاها قلت ليها ان شاء الله تمام قالت لي الحمد لله احسن كتير قلت ليها خلاص الصباح نمشي نعمل فحوصات واتاكد واطمن عليها.
سبحان الله رغم اني كنت خايفه منهم جيت احتميت بيهم واتقويت بيهم وهم بالرغم من وضعهم المأساوي الا انه بذرة الخير فيهم سبحان الله بالرغم من ظروفهم وحالتهم الظاهرة..
بذرة الخير في السودان اصيلة اصالة قيمنا وتراثنا وناسنا…. اتمني من الله اشوفهم تاني.
