ايكوسودان نت التنمية مستقبلنا
مقالات مشابهة
– غلطانة .. إنتي غلطانة انا ارسل ليك اخوي لزيت ل القير وانتي تعطيه هايدوروليك للدركسون!!
بنرفزة وصوت عالي وصل لمسامع كل من كان بالورشة هكذا خاطبني ذلك الزبون.
الذي رددت عليه بهدوء وثقة:
– انا ما غلطانة. غلطان اخوك. انا سألته داير زيت ل المكنة ولا ل القير؟! وهو قال لي انه داير هايدوروليك للدريكسون.
– اخوي ما بيغلط!! غلطانة انتي دي. انتي ما بتعرفي حاجة. الشغلة دي ما شغلتك. اخير ليك تمشي تشوفي مطبخك، ملاحك، وكسرتك
ليذهب تاركا اياي، وسط نظرات السخرية، المصوبة نحوي من الرجال المتواجدين بالورشة، وسط احاديثهم الخافتة، المتهكمة، المزعزعة للثقة.
لاكتشف مع مرور الايام ان الرجال يقومون بارتكاب الاخطاء، ويغلطو في مجالات عمل وفضاءات حياة لطالما اعلنوا ب حسم انها حكر عليهم دون النساء!!
حيث يقف على ذلك شاهدا ذاك الزبون، الذي سخر مني لأني استفسرت اكرم صاحب الورشة عن مقاس اسبير يريده. والذي لمن استهزاءً اكثر من قولة: انتي ما بتعرفي حاجة. قمت ومن وحي حقيقة تمرسي بقيادة السيارات، خاطبت اكرم على مسمع منه:
– هو الواحد بدل يسخر مني، ليذهب في الاول يتعلم قيادة السيارات، حسع الزول ده طريقة ايقافه لتلات ارباع سيارته داخل الاسفلت واغلاقه بذا طريق دخول وخروج السيارات من الورشة حسع ده ما غلط في غلط!!
علما انه مافي رجل من الرجال قال ليهو يا زول انت غلطان بطريقة ايقافك لسيارتك واغلاقك الطريق امامنا في حين انه في يوم اخر حينما ارتكبت تلك المراة نفس الغلط شالوا حالها بقولهم على مسمع منها: غلطانة. المراة دي غلطانة. وهي السواقة ليها شنو؟!! هي لمن ما بتعرف تقود السيارة، احسن ليها تمشي تقعد في بيتها.
كما يقف شاهدا ايضا على اكتشافي ان الرجال يقومون بارتكاب الاخطاء، ويغلطو في مجالات عمل وفضاءات حياة لطالما اعلنوا ب حسم انها حكر عليهم دون النساء!! ذاك العامل الذي يتأرجح بين منزلتي صبي ميكانيكي وميكانيكي! الذي اتضح لي لاحقا انه ما فارز اللباد من بن لباد!!!
وزميله ذلك الذي حينما التحق للعمل بالورشة، سرعان ما اكتشفت انه ما فارز مصفى الشاي من مصفى الزيت!!!
ووووو..
وحيث انه الرجال ما شالوا حال هؤلاء الرجال بقولهم على مسمع منهم: غلطانين. الرجال العمال ديل غلطانين. هم مالهم ومال الاشتغال في ورشة سيارات؟!! لمن الواحد فيهم جاهل ب اسبيرات السيارات، والاخر ما فارز مصفى الشاي من مصفى الزيت احسن يتركوا ورشة صيانة وخدمات السيارات. الشغلة دي ما شغلتهم. احسن يمشوا يشوفوا ليهم شغلة تانية. بدأت تتكشف لي حقيقة ان الرجال ما بيغلطو بعضهم البعض، ولا بيشيلوا حال بعض!!
لحدي ما دارت الايام على قول الست، ورأيت يوما رجل يقود ويسوق سيارته بطريقة غلط فوق مجرى السيارات العميق الصاعد لاعلى حيث يتم فك المصفى وتغيير زيت السيارة وبالنتيجة تكومت السيارة ووقعت جوه المجرى ب قائدها!
والذي حينما تبينت ملامحه – اي ملامح قائد السيارة الواقعة والمتكومة جوه المجرى – هتفت ب اكرم:
– يا اكرم ده مش ياهو الزول الذي فرج فيني الله وخلقه ذاك اليوم وشال حالي بهتافه بي: غلطانة!! انتي غلطانة انا ارسل ليك اخوي لحاجة وانتي تعطيه حاجة تانية خالص!! الشغلة دي ما شغلتك اخير ليك تمشي تشوفي مطبخك، ملاحك، وكسرتك؟!
يا اكرم الزول ده لا يفقه او يعرف شيء في سواقة السيارات وما عنده خبرة في القيادة!!
ومع ملاحظتي ان الرجال الذين شاهدوا منظر السيارة وهي تتكوم وتقع جوه المجرى ب قائدها مافي واحد فيهم فتح خشمه مع قائدها وقال ليهو يا زول انت غلطان!! وانهم لم يصوبوا بوجهه ابتسامات ساخرة او احاطوه باحاديثهم الخافتة المتهكمة المزعزعة للثقة تلكم تأكدت يومها من تلك الحقيقة، حقيقة ان الرجال ما بيغلطو بعضهم البعض، ولا بيشيلوا حال بعض!!
حتى جاء يوم رأيت فيه امراة تقود سيارتها نحو المجرى العميق الصاعد لاعلى بثقة وسلاسة فإذا ما صدمت وهبشت في طريقها صندوق معدات – اصلا هذا ليس بموضعه! – مجرد هبشة إلا واحاطت بها نظرات الرجال الساخرة وتعالت حولها احاديثهم الخافتة المتهكمة المزعزعة للثقة تلكم والتي حينما – اي قائدة السيارة – حينما شرعت في النزول من سيارتها بتردد وارتباك تفاجأت بظهوري ووقوفي إلى جانبها بابتسامة مشرقة وبصوت تناهى لمسامع الكل لها قائلة:
– مرحبا. نهارك سعيد مودموازيل. اسمحي لي اقول ليك انه قيادتك ممتازة يا ما شاء الله عليك، الرجال ديل لا نلقي لهم بالا وما تشتغلي بيهم الشغلة، ما تخليهم ينجحوا في اصابتك بالتوتر وافقادك ثقتك بنفسك وتشكيك في مقدرتك على القيادة.
المجرى ده ياما اتكومت ووقعت داخله سيارات كان سائقيها وقادتها رجال.
والتي بعد ان ندت منها تنهيدة ارتياح سألتني:
– يعني الرجال ما كلهم ناجحين في القيادة؟! وبيرتكبوا اخطاء وبيغلطو مثلنا نحن النساء؟!!
اجبتها:
– بادي ذي بدء حكاية انه القيادة الناجحة حكر على الرجال دي مجرد خرافة.
انا لي سبعة أعوام متحكرة في نص ورشة صيانة وخدمات السيارات هذه ادارة لها بالانابة. ايوه الرجال بيرتكبوا اخطاء وبيغلطو في مجالات عمل وفضاءات حياة لطالما اعلنوا ب حسم انها حكر عليهم دون النساء لكنهم ما بيشيلوا حال بعضهم البعض!
الرجال بيغلطو لكنهم ما بيفضحو بعض!!
عنقاء النيل
رندا عطية
صحفية سبرانية
randaattia171@gmail.com
