ايكوسودان نت التنمية مستقبلنا
مقالات مشابهة
بقلم وداد حجازي
كنت شغاله في مرفق حساس شويه طبيعة عملنا بنتحصل الرسوم وكانت مبالغ كبيره وبما انه كنا بتكون مبالغ كان لازم تكون في حراسه من الشرطه بالذات لما نمشي للتوريد لانه بنكون شايلين شنطه كبيره ومليانه قروش .
الشرطي الكان مكلف بالمهمه لاحظت عنده اشياء غريبه شويه ما اي زول ممكن يلاحظها يعني مثلا كان بتلفت كتير جدا وكان حذر جدا وسمعه مرهف اقل حاجه بسمعها والاغرب لما اناديهو بجيني صاغر وخالص ما برفع عينه يعاين وطوالي يقول لي حاضر ودايما يميل للعزله ما بدور يجتمع مع الناس انا حسيت انه في الامر في سر خاصه لما يجي الصباح احس انه داير يقول حاجه بس ما بقدر .
في يوم من الايام كان شغلنا خفيف مافي زحمه وهو جا وقف حسيت انه راسه مليان كلام سالته قلت ليهو مالك يا يونس في حاجه اتردد كده قال لي انا عاوز اقول ليك يا امي والله حسيت بقلبي ده لما وجعني قلت ليهو ابشر من اللحظه دي انا امك فسالته قلت ليهو يا يونس لو انت حاسي اني امك فعلا احكي لي مالك انت فقال لي انا عاوز احكي ياامي لكن ما لاقي زول يسمعني قلت ليهو انا سامعاك قول :-
ابتدا يحكي قال لي انا امي ماتت خلتني عمري تسعه سنوات وانا مما وعيت علي الدنيا شفتها عيانه ابوي كان بعمل اي حاجه في البيت وما كان عندي اخوان وعندي خالي دايما بيجي يشوفها ويقعد معاها ويمشي لما امي ماتت بقينا انا وابوي برانا في البيت ناكل ونشرب بسوي ابوي اي حاجه حتي هدومي بغسلها لي بعد سنه من وفاة امي ابوي عرس وجاب العروس في البيت بالله عروسو دي ما كرهت زول في الدنيا الا انا واي حاجه اعملها صاح ولا غلط بتكلم ابوي وابوي ما يكذب خبر يقع فيني ضرب وانا بعد اجي من المدرسه بمرق العب مع الاولاد في الشارع احيانا الاولاد البلعب معاهم ينادوني عشان اكل معهم ومرات اجي البيت بدون اكل لو ابوي قاعد مرت ابوي بتديني ولو ابوي مافي بقعد بالجوع وحتي الفرش البنوم فيهو مرت ابوي كانت ما راضيه اني انوم فيهو قالت لابوي يونس بلعب في الشارع وبجي يرقد يوسخ الفرش طوالي بقت تلم الفرش تخليني انوم بدون فرشه المهم انها ضيقت علي الخناق شديد وانا زهجت من الوضع بس يوم من الايام قررت تاني ما اقعد في البيت نهائي بس اما جيت من المدرسه لقيتها مافي في البيت وسبحان الله لما تمرق بتقفل المطبخ والاوضه واي حاجه مقفوله بي طبله الا محل انا قاعد طوالي لميت هدومي في شنطة المدرسة ومرقت من البيت ولا عندي اي قروش ولا حاجه غير هدومي فضلت ماشي وماشي من الساعه واحده لحدي ما المغرب قرب يدخل بس لقيت اوضه كده فيها مره ومعاها شفع قدري كده طوالي دخلت عليهم المره سالتني وكلمتها قالت لي ادخل اقعد مع اخوانك ديل والله كانت احسن من مرت ابوي غايتو ما بعرف الاولاد ديل كانو بمرقو من الصباح وبجو شايلين ليها الاكل وبتدينا ناكل لكن ما عارف بجيبوهو كيف بعد تميت تلاته يوم قالت لي امشي معاهم بقيت كل يوم امشي معاهم قالو لي اعمل حسابك احتمال البوليس يجي يسوقنا في اي وقت لانه نحن بقولو متشردين ( وده السبب البخلي يونس بتلفت كتير وسمعه مرهف لانه بكون خايف طبعا الخوف من البوليس وعدم الاستقرار تركت في في نفسه رواسب بالرغم من انه هو بوليس) .
اكتر من سنتين يا امي وانا علي الحاله دي لا اكل زي الناس ولا نوم زي الناس ولا استقرار ودايما بكون في حالة خوف احيانا بدون سبب بحس بالخوف.
في يوم من الايام وانا حايم في حوامتي دي شفت خالي الكان بجي لامي نازل من عربيه طوالي جريت عليهو في البدايه ما عرفني قلت ليهو يا خالي انا يونس ولد المرحومه فاطمه بس خالي مسكني وبكا بكا شديد طبعا انخلع من منظري وانا متشرد قال لي مالك الحصل عليك شنو ووين ابوك? قلت ليهو ماعارفه وين من ما فارقتهم قال لي ما سال منك قلت ليهو ما عارفه بس خالي من دربه داك فارق الناس الجا معاهم ومسكني من يدي وساقني بيتو مرت من شافتني قعدت تبكي وطوالي دخلوني الحمام وغيرت هدومي كان عندهم ولد قدري كده والله مرت خالي كانت حنينه علي وطبعا هي زاتها خالتي بت عم امي
خالي ومرتو قدر ماحنسوني ارجع لابوي رفضت ماكنت حابي ارجع تاني للزل والهوان والمدهش انو خالي مشي كلم ابوي انو لقاني لكن ابوي ما ابدي استعداد لانو يستقبلني تاني… الحكاية دي اثرت في نفسيتي فترة لكن الحمد لله بوجودي في جو اسري سليم قدرت اتجاوز النقطة دي…. المهم بعد اسبوع كده خالي قال لي ترجع المدرسه طوالي وافقت خالي ساقني ومشيت المدرسه وقبلوني وبقيت امشي مع اولاد خالي عادي يقوم من الصباح خالي يدينا المصاريف انا واولاده ما كنت شاطر لكن كنت بنجح المهم لحدي ما جات الامتحانات الاساس نجحت لكن بالمرور بس دخلوني الثانوي كذلك بنجح بس يا داب كده لحدي ما جا امتحان الشهاده كذلك نجحت بنسبه ضعيفه خالي قال تعيد السنه قلت يا خالي ما داير اعيد داير اشتغل قال تشتغل شنو قلت بوليس طبعا علي حسب العقده الكانت عندي طوالي خالي عنده قريبو ضابط كبير في البوليس كلمو لي وكان في تجنيد فاتح طوالي قبلوني ودخلوني المعسكر قلت ليهو يا يونس حسي تميت كم سنه? علي فكره كان عنده شريطين يونس قال لي تمنيه سنه وانا ياامي مافي اي زول سمع حكايتي دي انا الليله ارتحت نفسيا قلت ليهو ابشر والله.
كنت دايما برشده وبوجهه واصلا ما كان بخالفني ويعلم الله كنت دايما غرضي مصلحته وشويه شخصيته ابتدت تتصلح .
يونس من ضمن كلامه قال لي خالي كان عنده شافعه صغيره وانا من دخلت عليهم بريدا واقول يارب في نصيبي لكن يوم واحد ما قربت عليها ولا قلت ليها حاجه.
يوم من الصباح يونس جاني قال لي يا امي انا التعاقد بتاعي مع الشرطه انتهي وما عاوز اجددو قلت ليهو يا يونس بعد ما تخلي الشرطه عاوز تعمل شنو? قال لي عاوز اشيل حقوقي واعمل لي بترينه بتاعت موبايلات قلت ليهو يا يونس بتجيب قروش قال لي ما بعملها هنا بمشي مع اولاد خالي كوستي وهم كانو بحبو يونس شديد قلت ليهو خلاص يا يونس لو انت شايف كده احسن ما تجدد قال لي والله كده احسن قلت ليهو خلاص اتوكل علي الله والله معاك .
يونس بعد خلي الشرطه بقي جاري ساكي الحقوق لحدي ما طلعها من وزارة الداخليه واستلمها وكانت مبلغ ما بطال طوالي جاني قال لي خلاص يا امي انا بقيت مسافر قلت ليهو اتوكل وربنا يعدل خطوتك وسافر علي كده اخباره ما انقطعت عني في البدايه لكن بالتدريج شويه شويه يونس انغمس في الحياة العمليه والقروش جرت في يده واخباره مره مره اسمعها لحدي ما انقطع.
بعد فتره وانا نسيتو وما عرفت عنه حاجه انا نقلوني الابيض بعد وصلت الابيض وبي كم يوم قلت امشي السوق اشوف الحاصل شنو واشتري لي اغراض بس وانا في نص السوق اشوف ليك الناس تتحاري وراي اتلفت قالو لي الزول داك بناديك والله ما اشعر الا القي يونس قدامي والله ما صدقت بس مسكتو وبكينا في نص السوق الاجمل يونس كان محنن قلت ليهو ما شاء الله يا يونس عرست قال لي لا داير اعرس وديل اصحابي عاملين لي حنه وكان مبسوط شديد قال لي خلاص الا تمشي معاي قلت خلاص انت امشي وسوي العرس انا يا داب جايه في الابيض ما بقدر امشي انت بعد تعرس جيب العروس وتعالو لي فعلا مشي والعروس كانت بت خالو الكان بريدا وسالته من احوالو وعرفت انه مرت خاله ماتت. المهم يونس عرس وجاب العروس وقضي معانا يومين حلوين شديد وطبعا تجارة الموبايلات مشت معاهو وبقي خبير فيهن واستقر في كوستي.
الحمد لله تاني ما انقطع عني والله اي حاجه تحصل ببلغني بيها والحين انجب ولدين بس عنده مشكله طبعا لانه اتبهدل وضاق الزل واتعذب يونس ما بحب يفارق اولادو خالص.
اكتر حاجه انا عملتها مع يونس اني رجعته لي ابوهو قلت ليهو مهما حصل ده ابوك حسي ما شاء الله عليهو اخر روقان.
الحمد لله ان بعد العسر يسر.
